Чүпрәледә ТАССР оешуга 100 ел тулу елында беренче никахлашкан парны котладылар
(Чүпрәле, 11 гыйнвар, «Татар-информ», «Туган як», Гөлия Фәизова). Бүген, 2020 нче елның 10 гыйнваренда Чүпрәле районы ЗАГС бүлегендә беренче парны теркәү тантанасы узды. Бу турыда район басмасы хәбәр итә.
ТАССРның 100 еллыгын һәм район оешуның 90 еллыгын билгеләп үтәчәк елда Яңа Уби авылыннан Ксения һәм Алексей Ятмановлар беренче гаилә документы — никахлашу турында таныклык алды.
Бәхетле парны тантаналы шартларда район башлыгы Марат Гафаров котлады. Яшь парларга Марат Ринат улы беренче гаилә документын — никах теркәү турында таныклык һәм бүләк тапшырды, бәхетле һәм озын гаилә тормышы теләде.
Җылы теләкләргә ЗАГС бүлеге җитәкчесе Альбина Шәрәфетдинова, туганнары һәм якыннары кушылды.