Татарстан җыелма командасы WorldSkills илкүләм финалында 158 компетенциядә катнашачак
(Казан, 31 август, «Татар-информ»). 6-21 сентябрьдә «Яшь профессионаллар» (WorldSkills Russia) VIII илкүләм чемпионатының финалы дистанцион форматта беренче тапкыр узачак. Бу турыда WorldSkills Russia матбугат хезмәте хәбәр итә.
«Республика җыелма командасы 158 компетенция буенча ярышларда катнашачак. Бу финалда 206 катнашучы көч сынаша. Илкүләм чемпионат финалы кысаларында ярышлар 210 компетенция буенча уза. Илкүләм беренчелектә Россия Федерациясенең 85 субъектыннан 2800дән артык кеше чыгыш ясаячак, алар арасында яшүсмерләр һәм чит ил конкурсантлары булачак», диелгән хәбәрдә.
«Яшь профессионаллар» (WorldSkills Russia) VIII Илкүләм чемпионаты финалы Россиядә һәм бөтен дөньяда соңгы 8 елда иң киңкүләмлесе булачак. Ул көллиятләрнең төбәк мәйданчыкларында, шулай ук махсуслаштырылган һәм халыкара компетенцияләр үзәкләрендә узачак. Татарстанда ярышлар 45 мәйданчыкта узачак. Аларның 24е Казанда һәм 21е республиканың башка торак пунктларында урнашкан.
Идарә үзәге «Казан Экспо» халыкара күргәзмә үзәгендә оештырылачак, анда 32 компетенция буенча экспертлар эшләячәк. Теләге булган һәркем дөньяның теләсә кайсы почмагыннан ярышларны онлайн-трансляция ярдәмендә күзәтә алачак.