Буа районының Яшевка авылында грант акчасына яңа ферма төзелә

(Казан, 23 ноябрь, «Татар-информ», «Байрак» ). Буа районының Яшевка авылында фермер Петр Лапшин яңа ферма төзи. Бу хакта район газетасы яза.

Төзелеш Татарстан Республикасы Авыл хуҗалыгы һәм азык-төлек министрлыгының «Крестьян-фермер хуҗалыгы базасында гаилә терлекчелек фермаларын үстерү» программасы буенча отылган грант акчасына алып барыла. 

«Грантның гомуми суммасы 25 миллион сум. Аңа ферма төзергә, техника һәм 40 баш нәселле тана алырга тиешбез. Ферма 152 баш терлеккә исәпләнгән. Эш тулысынча диярлек автоматлаштырылган, кул хезмәте минимальләштерелгән булачак», — диде фермер. Бинаны сафка бастыру инде төгәлләнеп килә, нәселле таналар алу мәсьәләсе дә хәл ителә. 

Фермерның дәүләт ярдәменнән беренче генә файдалануы түгел. 2017 елда ул «Яңа эш башлаучы фермерларга ярдәм» конкурсында җиңеп, 3 миллион сум грант откан иде. Әлеге акчага «МТЗ-82» тракторы алды, сыерлары санын 30 башка арттырып, 46га җиткерде. Киләчәктә фермер хуҗалыгын тагын да киңәйтергә, голштин нәселле сыерлар белән көтүне 200 башка кадәр ишәйтергә планлаштыра.

«Хатыным Ольга белән терлекләрне һәрвакыт тоттык. Аннан башка авыл тормышын күз алдына да китереп булмый. Башта үгезләр, аннан сыерлар санын арттырдык. 2015 елда авыл хуҗалыгына ныклап тотынырга, өстенлекне сөт җитештерүгә бирергә уйладым. Ул авыр булса да, рентабельле бизнес. Сөткә сорау зур», — диде Петр Лапшин.

Бу максатта башлап ферма арендалыйлар аннан аны сатып алалар. Бүген менә яңасын төзиләр. Шулай ук үз җирләре бар, бүгенге көндә аның мәйданын 350 гектарга җиткергәннәр. Шактый зур хуҗалыкны алып бару өчен Петр Николаевичка төрле һөнәрләр үзләштерергә туры килә. Бүген ул кирәк икән трактор руле артына утыра, ветеринар эшен дә белә, диелә хәбәрдә.