(Чирмешән, 22 декабрь, «Татар-информ», «Безнең Чирмешән» , Кадрия Гамирова). Чирмешән районының Түбән Кәминкәдәге табиблык амбулаториясе киләсе елда яңа бинага күчәчәк. Авылның уртасында, кибет янында төзелгән блок-модульле амбулаториядә вак-төяк җитешсезлекләрне төзәтәсе һәм документ эшләрен төгәллисе генә калган. Бу турыда район басмасы хәбәр итә. Зур булмаган, 108 квадрат метрлы, яңа дәвалау учреждениясе — көндезге стационар биш урынга исәпләнгән. «Стационарда елга 200ләп авыру дәва ала, ә кабул итүдә 1700ләп кеше була. Безнең участокка Кармыш, Әккәрәй, Яшәүче, Күтәмә, Кара Чишмә һәм Түбән Кәминкә авыллары керә. Ә пациентлар бу авыллар халкы белән генә чикләнми, башка тирә-күрше авыллардан да килүчеләр күп. Көнгә 7-15 авыру кабул итәргә туры килә. Кызганыч, инде ике еллап амбулаториянең автомобиле юк, монысы җайсызрак», — ди Түбән Кәминкә врачлык амбулаториясе мөдире Максим Просвиркин. Амбулаториянең үзендә үк ЭКГ үтәргә, кан һәм бәвел анализлары тапшырырга була. Шуларның нәтиҗәләре буенча гомумпрактика табибы Максим Викторович авыруларга дәва билгели. Биредә барлыгы 7 кеше эшли. Ачык йөзле, йомшак телле шәфкать туташлары авыруларга система да куялар, уколлар да ясыйлар.