Татарстанда -27 градус суык булачак
Пәнҗешәмбе көнне Татарстан территориясендә бозлавык һәм көчле җил көтелә. Төнге сәгатьләрдә урыны белән 27 градуска кадәр суык булыр дип фаразлана. Татарстанның Гидрометеорология үзәге шул турыда кисәтә.
Синоптиклар хәбәр итүенчә, урыны белән җилнең тизлеге секундына 15 метрга җитәчәк.
Төнлә республика буенча һава температурасы -17.. -22 градус тәшкил итә, көньяк һәм көнчыгышта -27 градуска кадәр төшәчәк. Көндез һава температурасы -10..-15 градус булыр дип көтелә.