Татарстанда автобус катнашындагы кеше үлеменә китергән авариядән соң җинаять эше ачылган
Бүген Татарстанның Кама Тамагы районында кеше үлеменә китергән авариядән соң җинаять эше кузгатылган. Бу хакта РФ Тикшерү комитеты ТР буенча идарәсе җитәкчесенең өлкән ярдәмчесе Андрей Шептицкий хәбәр итте.
Якынча мәгълүматлар буенча, Куйбышев Затонына таба хәрәкәт иткән җиңел автомобильнең йөртүчесе имин тизлек сайламаган, каршы як полосага чыккан һәм автобус белән кара-каршы бәрелешкән.
Нәтиҗәдә, автобустагы биш пассажир төрле тән җәрәхәтләре алган, җиңел автомобильнең йөртүчесе шунда ук һәлак булган. Әлеге факт буенча юл йөрү кагыйдәләрен бозу маддәсе нигезендә җинаять эше кузгатылган.