Татарстан вице-премьеры Евгений Варакин Рубежное шәһәрендә гуманитар үзәктә булды
ТР Вице-премьеры Евгений Варакин Рубежноеда гуманитар үзәк эшен тикшерде. Шеф-регион вәкиле миссия җитәкчесе Оксана Удовина белән очрашты һәм халык арасында ярдәмне бүлү һәм шәһәр халкының хәзерге вакыттагы ихтыяҗлары белән танышты. Бу турыда «Татар-информ» хәбәр итте.
Гуманитар штабка бер яшькә кадәрге сабыйлар өчен товарлар һәм азык-төлек кирәк булган кечкенә балалы яшь гаиләләр ешрак мөрәҗәгать итә башлаган.
«Бу шәһәрнең тыныч тормышка кире кайтуына турыдан-туры дәлил. Яшьләр гаилә кора, балалар таба, күбесендә беренче бала. Татарстан җитәкчелегенә һәм республика волонтерларына безгә даими рәвештә балалар өчен товарлар – коляскалар, памперслар, балалар ризыгы, уенчыклар алып килгән өчен рәхмәт белдерәсем килә. Бу бик сизелерлек ярдәм», - дип сөйли Удовина.
Гуманитар штаб җитәкчесе шәһәргә йолдызлы кунак - Данис Зариповның килүен аерым билгеләп үтте. Ул ата-аналарның танылган хоккейчының мәктәпкәчә яшьтәге балалар өчен спорт өс һәм аяк киемнәре алып килүен белгәч, балалар белән үзәккә килә башлаганнарын әйтте.
Евгений Варакин штабта булган вакытта Глеб исемле малай үзенә яңа кроссовкилар һәм спорт баш киемен сайлый, ул гуманитар ярдәм тарату пунктына үзенең өлкән абыйсы белән килгән.
Шунысын да билгеләп үтәргә кирәк, ТР һәм Рубежное арасында хезмәттәшлек турында килешү имзаланганнан бирле, шеф-регион шәһәргә 650 тоннадан артык гуманитар йөк китергән инде.
Материал Сергей Толмацкий ярдәмендә әзерләнде.