Рөстәм Миңнеханов Җиңү көне уңаеннан кабул итүдә: Бүген без бердәмлек күрсәтергә тиеш
Татарстан Рәисе Рөстәм Миңнеханов Казан Кремлендә Бөек Ватан сугышында Җиңүнең 79 еллыгы уңаеннан узган тантаналы кабул итүдә 9 Майны илнең төп бәйрәме дип атады һәм үткәндә күрсәткән батырлыкны хәзерге катлаулы геосәяси вәзгыять белән бәйләде.
Республика җитәкчесе матбугат хезмәте хәбәр иткәнчә, Рөстәм Миңнеханов үз чыгышында сугыш ветераннарын һәм тыл хезмәтчәннәрен сәламләгән, аларны Җиңү көне белән котлаган.
«Без сугышта 27 миллион кешене югалттык. Бу Җиңү өчен түләргә туры килгән бәя. Бүген без бердәмлек һәм югары баш командующиебызга [Владимир Путинга] теләктәшлек күрсәтергә тиеш. Безнең егетләр хәзер хәрби позицияләрдә. Без махсус хәрби операция өчен кирәк булганның барысын да тәэмин итәргә тиеш», — ди ТР Рәисе.
Моннан тыш, Миңнеханов Җиңүнең 79 еллыгы уңаеннан масштаблы чараларны оештыручыларга рәхмәт белдерә. «Искиткеч парад! Шулкадәр күп кеше катнаша, күп санлы техника. Барысы да яхшы оештырылган. Ә иң мөһиме – ветераннарыбыз канәгать калды», - ди ул.
Очрашуда катнашкан ТР Дәүләт Киңәшчесе Минтимер Шәймиев илнең Бөек Ватан сугышында үз азатлыгын һәм бәйсезлеген яклап кына калмавына, ә соңыннан җимерелгән шәһәрләрне һәм инфраструктураны торгыза алуына игътибар итте.
«Безнең халык көчле рухлы. Авыр вакытларда без һәрвакыт берләшәбез, тагын да ныгый барабыз. Һәм без моны хәзер, илебез авыр сынау узганда күрсәтәбез. Без безнең белән исәпләшмичә булмаганлыгын расладык», - дип ассызыклады Россиянең Хезмәт Герое.