Рөстәм Миңнеханов Балык Бистәсе районында «Кояшкай» балалар бакчасында булды
Татарстан Рәисе Рөстәм Миңнеханов республиканың Балык Бистәсе районына эш сәфәре барышында Биектау авылының «Кояшкай» балалар бакчасында булды. Бу хакта ТР Рәисенең матбугат хезмәте хәбәр итә.
Мәктәпкәчә учреждение 2020 елның декабрендә файдалануга тапшырылган. Бина республика бюджетыннан күчерелгән акча хисабына төзелгән. Бакча 50 балага исәпләнгән, хәзерге вакытта анда яшь ярымнан җиде яшькә кадәрге утызга якын сабый йөри. Биредә 14 штаттагы хезмәткәр, шул исәптән дүрт педагог эшли.
Республика җитәкчесе үзен озатып йөрүче затлар белән музыка залын һәм методик кабинетны карады, шулай ук балалар бакчасының аш бүлмәсенә һәм ашханәсенә кереп чыкты.
Рөстәм Миңнеханов шулай ук бүген Яңавыл фельдшер-акушерлык пунктында булды. Учреждение 2023 ел ахырында файдалануга тапшырылган, 300дән артык җирле халыкка хезмәт күрсәтә. ФАПның кадрлар составы 2 штат берәмлеге.
Элегрәк «Татар-информ» агентлыгы хәбәр иткәнчә, Рөстәм Миңнеханов эш сәфәре белән Балык Бистәсе районына килде. Ул роботлаштырылган фермада булды һәм хуҗалык җитәкчеләре, инвесторлар, муниципалитетның авыл җирлеге башлыклары белән аралашты.
Татарстан Рәисен Балык Бистәсе районы башлыгы Радик Исламов, ТР вице-премьеры – авыл хуҗалыгы һәм азык-төлек министры Марат Җәббаров, ТР мәгариф һәм фән министры Илсур Һадиуллин һ.б. рәсми затлар озатып йөри.