Татарстан Вәкиллеге һәлак булган солдатларны эзләү белән шөгыльләнүче Вәлиевне бүләкләде
Полковник Айрат Вәлиев Татарстанның Россиядәге Тулы вәкаләтле вәкиллеге каршындагы Офицерлар клубында узган очрашуда эзтабарлык эше турында сөйләде. Ул хатыны Венера белән инде 15 ел әлеге эш белән шөгыльләнә. Бу хакта Вәкиллекнең матбугат хезмәте хәбәр итә.
«Без «Память» эзтабарлар отряды белән эшлибез. Ул Ржев районы территориясендә урнашкан. Сугыш хәрәкәтләре барган урыннарда 15 ел казу эшләре белән шөгыльләнәбез. Медальоннар буенча Кызыл армия хәрбиләре, солдат һәм командирларының шәхесләрен ачыклыйбыз, аларның туганнарын эзлибез, ачыкланганнарының сөякләрен яңадан җирлибез», - диде ул.
«Ел саен җәй буе, бер сезонда - апрельдән башлап ноябрьдәге беренче салкыннарга кадәр - меңгә якын кешене ачыклыйбыз. Эш ел әйләнәсе мондый тәртиптә оештырыла: казу эшләре кышка кадәр бара, кышын туганнарны эзләү белән шөгыльләнәбез», - диде Вәлиев шул хакта сорауга җавап биреп.
Татарстанның Россиядәге тулы вәкаләтле вәкиле Равил Әхмәтшин Офицерлар клубы әгъзасы Айрат Вәлиевкә Бөек Ватан сугышы елларында хәбәрсез югалган солдатларны эзләүгә юнәлдерелгән зур һәм кирәкле эш башкарганы өчен рәхмәт белдерде. Ул ирле-хатынлы Вәлиевләргә «Армия генералы Мәхмүт Гәрәевнең тууына 100 ел» истәлекле медален тапшырды.
Видео: Татарстанның Россиядәге Тулы вәкаләтле вәкиллеге матбугат хезмәте.