Дәүләт Думасы Мантуровны Россиянең беренче вице-премьеры итеп раслады
Дәүләт Думасы депутатлары пленар утырышта Денис Мантуровны РФ Хөкүмәте Рәисенең беренче урынбасары вазифасына билгеләүне хуплады. Бу хакта Россия парламентының түбән палатасы сайтында хәбәр ителә.
Шулай ук депутатлар вице-премьерлар вазифасына кандидатураларны – Татьяна Голикова, Дмитрий Григоренко, Александр Новак, Алексей Оверчук, Дмитрий Патрушев, Виталий Савельев, Юрий Трутнев, Марат Хөснуллин һәм Дмитрий Чернышенконы раслады.
Барлык кандидатуралар да РФ Премьер-министры Михаил Мишустин тарафыннан кертелде. Кичә кандидатлар профильле комитетлар депутатлары белән очрашты. Бүгенге пленар утырышта парламентарийлар аларга үз сорауларын бирде. Шулай ук фракция җитәкчеләре дә чыгыш ясады.
Фикер алышу барышында Дәүләт Думасы спикеры Вячеслав Володин барлык тәкъдим ителгән кандидатларның да парламентарийларга яхшы билгеле булуын билгеләп үтте.
«Без алар белән илгә кичерергә туры килгән авыр сынаулар вакытын үттек», - дип йомгаклады ул.
Җомга, 10 майда, Дәүләт Думасы Михаил Мишустинны РФ Хөкүмәте Рәисе итеп раслады. Аннары аны билгеләү турындагы Указны Россия Президенты Владимир Путин имзалады.
Мартта илдә Президент сайлаулары узды. Анда гамәлдәге дәүләт башлыгы Владимир Путин җиңү яулады. Закон буенча, министрлар кабинеты янәдән сайланган Президент инаугурациясе көнендә үз вәкаләтләрен тапшыра. Шуннан соң яңа Министрлар кабинетын формалаштыру процедурасы үткәрелә.