Хөкүмәттә автомобильне куркыныч итеп йөрткән өчен штраф турындагы проектны хупладылар
Хөкүмәтнең закон проекты эшчәнлеге буенча комиссиясе автомобильне куркыныч итеп йөрткән өчен административ җаваплылык кертү турындагы закон проектын концептуаль яктан хуплады. Бу хакта РИА Новости хәбәр итә
Закон проекты Дәүләт Думасы депутаты Ярослав Нилов тарафыннан әзерләнгән һәм РФ Административ хокук бозулар турында кодексның 12 бүлеген яңа маддә белән тулыландырырга тәкъдим итә, ул автомобильне куркыныч йөрткән вакытта юл йөрү кагыйдәләрен бозган өчен 3 меңнән 5 мең сумга кадәр штраф рәвешендә административ җаваплылыкка кагыла. Кабат хокук бозган очракта 1 айдан 3 айга кадәр машина йөртү хокукыннанан мәхрүм итү каралган.
Билгеләп үтелгәнчә, закон проектында ЮХИДИ хезмәткәрләренең административ хокук бозулар турындагы эшләрне карау буенча вәкаләтләрен беркетүче нигезләмәләр юк.
«Шул ук вакытта закон проекты нигезләмәләрен гамәлгә ашыру штат саны артуга һәм федераль бюджеттан башкарма хакимиятнең кызыксынучы федераль органнарына өстәмә бюджет ассигнованиеләре бүлеп бирүгә китерергә тиеш түгеллеген исәпкә алырга кирәк», диелә документта.
«Россия Федерациясе Хөкүмәте, күрсәтелгән кисәтүне исәпкә алып, эшләп бетерелгән очракта, закон проектын хуплый», - дип йомгакладылар комиссиядә.
Куркыныч йөртү турындагы юл йөрү кагыйдәләре нормасы 2016 елның җәендә үз көченә керде, шул ук вакытта йөртүчеләргә карата нинди дә булса санкцияләр кабул ителмәде.