Һадиуллин Казанның 18 нче мәктәбенең беренче директорын 100 яшьлек юбилее белән котлады

Татарстан мәгариф һәм фән министры Илсур Һадиуллин Казанның 18 нче мәктәбенең беренче директоры Олимпиада Краснованы 100 яшьлеге белән котлады. Бу хакта ведомствоның матбугат хезмәте хәбәр итә.

Олимпиада Краснова 1925 елда Саратов өлкәсендә туа. Казанга күчкәч, ул башта химия-технология институтына укырга керә, ләкин соңрак юнәлешен үзгәртә һәм Казан педагогика институтының чит телләр факультетын тәмамлый.

Соңыннан ул 24 нче мәктәптә укытучы булып эшли башлый, ә 1959 елда яңа гына ачылган 18 нче мәктәпне җитәкли. Аның җитәкчелегендә 1966 елда яңа ун еллык укыту системасы буенча укучыларның беренче чыгарылышы була.

Һадиуллин билгеләп үткәнчә, Олимпиада Краснова тырышлыгы белән мәктәп нык нигез алды һәм хәзергә кадәр югары әзерлек дәрәҗәсен саклый.

«Сезнең исемегез – Олимпиадага - югарылыкка омтылыш салынган, һәм сез гомер буе аңа тугры бардыгыз, һөнәри биеклекләрне яуладыгыз һәм үз укучыларыгызны моңа рухландырдыгыз. Сезгә нык сәламәтлек, күңел җылысы һәм Сез ачкан мәктәпнең яңа буынга белем яктысын бирүенә шатланып яшәвегезне телим», - диде министр.