Наилә Зиннәтуллина: Татарстан - шәһәр мохитен булдыру буенча әйдәп баручы төбәк

«Муниципаль сәгать» программасында Татарстан Рәисе Рөстәм Миңнеханов инициативасы белән башланган иҗтимагый киңлекләрне үстерү буенча ун еллык эшкә йомгак ясалды.

ТР шәһәрләрне үстерү институты директоры Наилә Зиннәтуллина билгеләп үткәнчә, программа меңләгән кешенең тормышын үзгәртте. Аның сүзләренчә, программа ярдәмендә кешеләр өйләрендә генә түгел, ә иҗтимагый киңлекләрдә – паркларда, скверларда, яр буйларында, шәһәр һәм авыл урамнарында да үзләрен уңайлы хис итә ала.

«Өйдә кәефең яхшы булу бер хәл, ә шәһәргә шундый кәеф белән чыгу бөтенләй икенче. Минемчә, иҗтимагый киңлекләрне үстерү программасының төп нәтиҗәсе - кешеләрнең кәефе, аларның үзләре турында мохит, шул исәптән шәһәр мохите аша кайгыртуларын аңлаулары», - дип билгеләде ул.

Зиннәтуллина ассызыклаганча, Татарстан барлык районнарда иҗтимагый киңлекләрне үзгәртеп кору белән системалы рәвештә шөгыльләнә торган беренче төбәк.

«Без әйдәп баручылар, пионерлар идек. Татарстанга кадәр бер генә төбәк тә ел саен комплекслы рәвештә иҗтимагый киңлекләр буенча эшләмәде. Төбәк программасы юк иде, федераль программа турында хәтта берәү дә хыялланмады. Әмма 2015 елда Казанда Горький паркы үзгәртелгәннән соң, Рөстәм Нургалиевич зур һәм кечкенә шәһәрләрдә, һәр авылда уңайлы мохит тудырырга кирәк дигән карар кабул итте. Чөнки Татарстанда яшәүче һәркемнең тирә-ягында күңелле, уңайлы һәм имин урын булырга тиеш», - дип йомгаклады Наилә Зиннәтуллина.