Синоптик Татарстанда беренче карның кайчан явачагын әйтте
Күпьеллык статистика мәгълүматларына караганда, Татарстан территориясендә беренче суыклар, районга карап, ешрак сентябрьнең өченче декадасында яки октябрьнең беренче декадасында күзәтелә. Бу хакта «Татар-информ»га ТР Гидрометеорология үзәге башлыгы Феликс Гоголь хәбәр итте.
«Иң иртә суыклар килү август азагыннан сентябрьнең беренче декадасына кадәр аралыкта теркәлгән», - дип билгеләде Феликс Гоголь.
Аның сүзләренчә, беренче кар төбәктә ел саен төрле вакытта ява. Ул сентябрьдә яки октябрьдә ява ала, ә кайчакта, бик соңга калып, ноябрьдә генә төшәргә мөмкин.
«Республикада беренче тотрыксыз кар катламы уртача октябрьнең өченче декадасында барлыкка килә. Кар иң иртә яткан очраклар сентябрь азагында булган», - дип өстәде Гоголь.
Тотрыклы кар катламы исә Татарстанда уртача ноябрьнең икенче декадасы азагында ята башлый. Әмма тотрыклы кар катламы иң иртә барлыкка килгән очраклар октябрьнең икенче-өченче декадасына туры килгән.