Казанның 51нче санлы мәктәбендә мигрант балалары белән эш нечкәлекләрен сөйләделәр

Казан шәһәренең 51нче санлы мәктәбендә төрле милләт вәкилләре булган мигрантларның балалары укый. Чит ил гражданнары балаларының социаль-мәгариф адаптациясе барышы белән мәктәп директоры урынбасары, «Мәгарифтәге казанышлары өчен» дигән күкрәк билгесе иясе Любовь Капитонова сөйләде.

«Безнең мәктәп – күпмилләтле. Барлыгы 16дан артык милләт балалары белем ала. Мәктәп – бала өчен икенче өй, дип тә әйтәбез. Шуңа күрә дә, уку оешмасындагы мохит тә әһәмияткә ия. Күптөрле милләт вәкилләре укыганлыктан инклюзив белем бирүгә зур игътибар бирәбез. Бигрәк тә укучыларның мәктәп тормышына актив кереп китүләрен теләп, без даими рәвештә чаралар оештырып торабыз. Аннары, мәсәлән, былтыр безнең Тимерязев исемендәге университет белән зур форум булды. Анда нәкъ менә безнең мәктәптә мигрантлар балалары белән эшләү алымнарын күрсәттек», – дип белдерде ул.

Әңгәмәдәш, мәктәп Иске Татар бистәсендә урнашканлыгын һәм монда базарлар күп булу сәбәпле, мигрант балалары да шактый булуын әйтте.

«Чит ил гражданнарының балалары да рус телен яхшы белсен, кыенлыклар тумасын өчен рус телен – чит тел итеп укыту буенча махсус курслар ачтык. Ата-аналар да бик риза һәм кәнәгать булды. Ул курслардагы төркемнәрдә телне төрле дәрәҗәдә белүчеләр укыды. Аннары шундый проблема бар, Таҗикстаннан Россия гражданнары булган балалар килә. Ләкин, рус телен бөтенләй начар беләләр. Менә алар да шушы курсларга йөреп өйрәнде. Хәзер безнең мәктәптә рус телен аңламаучы, белмәүче бала юк», – диде ул.

• 51нче санлы мәктәптә барлыгы 470 укучы белем ала. Шуларның 50се – чит ил гражданнары балалары. Балаларга 32 укытучы белем бирә.