Марат Җәббаров алты районның игенчеләренә эшне тизләтергә чакырды

Татарстанның Әлмәт, Ютазы, Минзәлә, Сарман, Биектау һәм Нурлат районнары хуҗалыкларына туңга сөрү темпларын арттырырга кирәк. Бу хакта Татарстан Хөкүмәте йортында узган традицион киңәшмәдә Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров белдерде.

Барлык муниципалитетлар белән видеоэлемтә аша киңәшмәне Татарстан Премьер-министры Алексей Песошин уздырды. Анда шулай ук ТР Дәүләт Советы Рәисе Фәрит Мөхәммәтшин да катнашты, дип хәбәр итә республика Рәисе матбугат хезмәте.

«Бүгенге көнгә 1 миллион 360 мең гектардан артык җир, ягъни туңга сөрелгән җир мәйданнарының 88 проценты (1,6 миллион гектарга – Т-и. иск.) эшкәртелгән, шул исәптән 521 мең гектар сөрүлек катламы тирәнәйтелгән. Көзге сөрүне төгәлләгән районнар да бар», - диде докладчы.

Шул ук вакытта соңгы ике атнада республикада 18 миллиметр явым-төшем яуды. Бу айлык норманың 38 проценты. Синоптиклар фаразлавынча, киләсе атнада шулай ук явым-төшем көтелә, диде ул.

«Яңгыр туфрактагы дым запасын тулыландыру өчен бик кирәк. Бигрәк тә сөрүлек катламы тирәнәйтелгән басуларда дым яхшы туплана. <...> продуктив дымлылык бөтен җирдә дә җитәрлек дәрәҗәдә түгел», - дип игътибар итте Татарстан Республикасы Авыл хуҗалыгы һәм азык-төлек министрлыгы башлыгы.

Иң нәтиҗәле көзге агротехник алымнарның берсе буларак Җәббаров ашламалар кертүне атады. Азотлы ашламалар арасында иң нәтиҗәлесе – сусыз аммиак, чөнки азотның аммоний формасы туфракка ныклап сеңә, дип өстәде ул.