1 гыйнвардан паспортка үз теләгең белән алты төрле билге кертү мөмкинлеге булачак
Россия гражданнары 2026 елның 1 гыйнварыннан паспортка үз теләкләре буенча алты төрле билге кертү мөмкинлегенә ия булачак. Төп үзгәреш салым идентификациясенә кагыла: ИНН урынына (бу норма 2025 ел ахырына кадәр гамәлдә) документка халык турында мәгълүматның бердәм федераль мәгълүмати регистрыннан язма номерны кертеп булачак. Бу хакта «ТАСС» хәбәр итә.
Эчке эшләр министрлыгының матбугат үзәгендә аңлатуларынча, әлеге мәгълүматларны тиешле белешмәләр булганда салым органнары яки полиция бүлекчәләре кертә.
Яңа идентификатордан тыш, регламент паспортка түбәндәге мәгълүматларны ирекле рәвештә кертүне рөхсәт итә:
- гаилә кору һәм аерылышу турында — билге ЗАГС органнарында яки Эчке эшләр министрлыгында куела;
- балалар (14 яшькә кадәрге РФ гражданнары) турында — Эчке эшләр министрлыгында;
- элек бирелгән Россия паспортлары турында — Эчке эшләр министрлыгында;
- гамәлдәге чит ил паспортлары турында — Эчке эшләр министрлыгында яки күпфункцияле үзәкләрдә (МФЦ);
- кан төркеме һәм резус-фактор турында — дәүләт яки муниципаль медицина учреждениеләрендә.