Татарстан Урман хуҗалыгы министрлыгы былтыр учреждениеләр ремонтына 70 млн сум юнәлдергән
2025 елда ТР Урман хуҗалыгы министрлыгы карамагындагы тугыз учреждение бинасы ремонтланган. Эшләр иҗтимагый инфраструктура объектларын төзү, реконструкцияләү һәм капиталь ремонтлау өлкәсендә республика программасы кысаларында башкарылган, дип хәбәр итә ведомствоның матбугат хезмәте.
Бу максатларга бюджеттан 70 миллион сум акча бүленгән. Әлеге акча республика урман тармагы белгечләренең эш шартларын яхшыртырга мөмкинлек биргән. Әгерҗе, Азнакай, Арча, Яшел Үзән, Минзәлә, Шәһәр яны һәм Чирмешән урманчылыкларында, шулай ук Әлмәт һәм Ислейтар урман хуҗалыкларында тугыз объектка ремонт ясалган.
Эш күләме биналарның техник торышына бәйле булган. Кайбер очракларда - түбәләрне тулысынча алыштырганнар һәм фасадларны җылытканнар, икенчесендә инженерлык коммуникацияләрен яңартканнар.
ТР Урман хуҗалыгы министрлыгының милек белән идарә итү, техник үсеш һәм хезмәтне саклау бүлеге башлыгы Нияз Имамиев хәбәр иткәнчә, ведомствоның республика программасында катнашуы Татарстан Республикасы Рәисе Рөстәм Миңнеханов ярдәме белән 2028 елга кадәр озайтылды.
Аның сүзләренчә, яңартылган эш урыннары һәм заманча хезмәт шартлары белгечләргә республиканың урман ресурсларын саклау һәм арттыру бурычын нәтиҗәлерәк үтәргә мөмкинлек бирәчәк.
2026 елда тагын 70 миллион сумга сигез объектны ремонтлау күздә тотыла. Эшләр Арча, Азнакай, Бөгелмә һәм Яшел Үзән урманчылыкларында, Алабуга һәм Бөгелмә урман хуҗалыкларында, шулай ук Урман-янгын үзәгендә һәм Лубян урман-техника көллиятендә узачак.