Әлмәттә «Күрше» фестивале кысаларында «Әбием әкиятләре» урам спектакле күрсәтеләчәк
14 гыйнварда Татарстан нефтенең 60 еллыгы исемендәге шәһәр паркы ачык һавадагы театр мәйданчыгына әвереләчәк. Биредә «Күрше» кышкы республика фестивале кысаларында Әлмәтнең «Җиңел канатлар» иҗат коллективы «Әбием әкиятләре» урам спектаклен тәкъдим итәчәк.
Тамаша 18:00 сәгатьтә башлана. Тамашачылар үзенчәлекле татар авылы атмосферасына чумачак. Биредә әбекәйнең кечкенә өендә аның тылсымлы тарихлары яңгыраячак. Спектакль яраткан татар персонажлары – Шүрәле, Су Анасы, Убырлы белән таныштырачак һәм Зөһрә кыз турындагы риваятьне сөйләячәк.
Барлык кунаклар хуш исле татар чәе белән сыйланачак.
Проект Татарстан Республикасы Рәисе Рөстәм Миңнеханов инициативасы белән үткәрелә торган «Күрше» грант конкурсының кышкы сезонында җиңүче булды.