Казан каймасы мәдәни мирас объектлары реестрына кертелде
Казан каймасы - Кайбыч муниципаль районында урнашкан саклану корылмалары комплексы - мәдәни мирас объектлары реестрына кертелде. Бу хакта ТР Мәдәни мирас объектларын саклау комитеты матбугат хезмәте хәбәр итә.
Кайма 1941-1942 елларда Казанны саклау өчен төзелгән.
Казан каймасының озынлыгы 331 чакрым тәшкил иткән. Ул танкка каршы чокырлар, дзотлар, землянкалар һәм башка инженерлык корылмалары системасыннан гыйбарәт булган. Кайманы төзүдә республикада яшәүче дистәләгән мең кеше (нигездә, хатын-кызлар, яшүсмерләр һәм өлкән яшьтәге кешеләр) катнашкан.
Бөек Ватан сугышында Җиңүнең 80 еллыгын бәйрәм итүгә әзерлек кысаларында Татарстан Республикасында хәрби тарихка бәйле саклана торган объектлар исемлеген киңәйтү турында карар кабул ителде.
Мәдәни мирас объектларының бердәм дәүләт реестрына Бөек Ватан сугышы вакыйгаларына һәм геройларына бәйле 28 истәлекле урын һәм корылма кертелгән. Биредә мемориаль комплекслар, азат итүче сугышчыларга һәйкәлләр, Советлар Союзы Геройлары бюстлары, туганнар каберлеге һәм хәрбиләр җирләнгән каберләр турында сүз бара.
Казан каймасы 2024 елның октябрендә мәдәни мирас объекты дип танылган.
https://t.me/OKN_Tatar фотолары