Татьяна Буцкая: Ана капиталы программасы ярдәмендә Россиядә 2,5 миллионга кадәр бала туды

Ана капиталы – Россиядә демографияне арттыру өчен иң нәтиҗәле чара. Программа ярдәмендә илдә 2 миллионнан 2,5 миллионга кадәр бала туган. Бу хакта Дәүләт Думасының гаиләне яклау һәм аталар, аналар һәм балалар мәсьәләләре комитеты рәисенең беренче урынбасары Татьяна Буцкая хәбәр иткән. Аның сүзләрен «ТАСС» китерә.

Депутат 2036 елга кадәр Россиядә гаилә һәм демографик сәясәт стратегиясен гамәлгә ашыру һәм күп балалылыкка ярдәм итү чаралары планын шәрехләде. Дәүләт алдында ана капиталын куллануның гаиләләр өчен максималь дәрәҗәдә файдалы юнәлешләрен билгеләү бурычы тора, дип билгеләп үтте ул.

Россиядә ана капиталы программасы 2007 елдан бирле гамәлдә. Башта түләү икенче һәм аннан соңгы балалар туганда бирелә иде. 2020 елның 1 гыйнварыннан сертификатны беренче бала тугач та бирә башладылар.

Элегрәк РФ хезмәт һәм социаль яклау министры Антон Котяков 1 февральдән беренче бала өчен ана капиталы күләме 38 мең сумнан күбрәккә артачак һәм 729 мең сум тәшкил итәчәк, дип белдерде.

Икенче бала туган очракта, моңарчы бер тапкыр сертификат рәсмиләштергән гаиләләр өстәмә рәвештә 234 мең сумнан артык акча алачак. Әгәр гаилә беренче бала туганда ана капиталын алмаган булса, икенче бала тугач ул тулы сумманы – 963 мең сумны акча ала.

Ана капиталын түләү «Гаилә» илкүләм проекты максатларына туры килә.