Депутат Бессараб 1 февральдән 40 социаль түләүне индексацияләү турында сөйләде

Россиядә 1 февральдән 40 социаль түләү планлы рәвештә индексацияләнәчәк. Индексация гаилә һәм балалар пособиеләренә, ана капиталына, ташламалы түләүләргә, ташламадан файдаланучыларга айлык акчалата түләүләргә һәм эшсезлек буенча пособиеләргә кагыла. Дәүләт Думасының хезмәт, социаль сәясәт һәм ветераннар эшләре комитеты әгъзасы Светлана Бессараб «Татар-информ» агентлыгына шулай дип белдерде.

«Февральдән социаль ярдәмнең 40 төре индексацияләнә. Бу Росстат мәгълүматлары буенча бәяләрнең реаль үсешен исәпкә алып башкарыла. Хезмәткә түләүнең минималь күләменә бәйле булмаган барлык түләүләр якынча 5,6 процентка артачак», - диде ул.

Ана капиталы түбәндәгечә артачак:

. беренче балага - 690 267 сумнан 728 922 сумга кадәр;

. икенче һәм аннан соңгы балаларга (әгәр беренчесенә алмаган булсалар) – 912 162 сумнан 963 243 сумга кадәр;

. икенче балага (әгәр пособие беренче балага инде алынган булса) - 221 895 сумнан 234 321 сумга кадәр.

Индексация яңа сертификатларга да, файдаланылмаган акчаларга да кагыла.

Бала туганда яки уллыкка алганда бер тапкыр бирелә торган пособие февраль индексациясеннән соң 28 456 сумга кадәр артачак. Бала карау буенча айлык пособиенең минималь күләме – 10 837 сум, максималь күләме 83 021 сум тәшкил итәчәк.

СССР һәм РФ Хезмәт Геройларына айлык түләү - 103 693 сум, Хезмәт Даны орденының тулы кавалерларына – 76 473 сум, сугыш хәрәкәтләре ветераннарына – 4 839 сум, I төркем инвалидларга – 6 157 сум, II төркем инвалидларга – 4 397 сум, III төркем инвалидларга 3 520 сум тәшкил итәчәк.

Эшсезлек буенча пособиенең максималь күләме 15 886 сумга җитә. Мәрхүмне җирләүне оештыру өчен компенсация күләме 9 679 сумга кадәр арта.

Февральдә Россия законнарына һәм норматив хокукый актларына үзгәрешләр кертелә, алар гаиләләргә, социаль түләү алучыларга, сатучыларга һәм сатып алучыларга кагылачак.