Казанга Курск өлкәсендә яшәүчеләргә ярдәм иткән волонтерлар кайтты

Казанга Курск өлкәсендә яшәүчеләргә ярдәм иткән 10 волонтердан торган төркем кайтты. Алар авиаһөҗүмнәрдән соң өемнәрне сүтүдә, ныгытмалар төзүдә һәм башка процессларда катнаштылар.

«Бүген без «Курск рубежы» исемле «Бердәм Россия» лагеренда булган Татарстан делегациясен каршы алабыз. Анда булган вакытта безнең егетләр сигез йортны торгызуда булыштылар, ике ишегалдын төзекләндерделәр, 2 тоннадан артык төзелеш чүп–чарын һәм өемнәрен чыгардылар һәм башка бик күп нәрсәләр», – дип сөйләде «Татар-информ»га Татарстан Республикасы ихтыярыйлык мәгълүмати-ресурс үзәге директоры Айрат Мөбәрәкшин.

Татарстаннан килгән волонтерлар арасында – югары уку йортлары студентлары, яшьләр берләшмәләре активистлары һәм хәтта укытучылар составы вәкилләре дә бар. Аларның күбесе инде гуманитар миссияләрдә беренче тапкыр гына катнашмый.

«Курск рубежы» акциясе Россиянең барлык төбәкләрен колачлый. Егетләр бөтен илдән Курск өлкәсенә җирле халыкка ярдәм итү өчен киләләр.

«Безне мохтаҗларга һәм катлаулы тормыш ситуациясенә эләккәннәргә ярдәм итәбез дигән фикер җылытты. Безнең бик бердәм команда барлыкка килде. Мин үземне патриот дип саныйм һәм моны эш белән расларга теләгән идем, шуңа күрә бу гуманитар миссиягә киттем», – диде «Татар-информ» белән әңгәмәдә волонтерларның берсе Святослав Ефимов.

Татарстан делегациясе башлыгы итеп Казан югары уку йортларының берсендә укытучы Илнар Фәйзрахманов билгеләнде. Ул Курск өлкәсендә ватандашларының проблемаларыннан читтә кала алмады, һәм үз эшендәге тәнәфесен гуманитар миссиягә багышларга булды.

«Курск өлкәсендә кешеләр бәлагә юлыкты. Без барыбыз да аларга ярдәм итәргә телибез. Өйгә бары тик уңай хис-кичерешләр белән генә кайттык. Без шәһәрне торгызуга үз өлешләрен кертү өчен бөтен илдән кешеләр килүен күрдек», – дип хәбәр итте «Татар-информ»га Фәйзрахманов.