Казанда беренче «Манзара» урам биюе һәм театры фестивале уза

Иске Татар бистәсе территориясендә Идел буе әкияти фольклоры темасына багышланган «Манзара» беренче эксперименталь фестиваль-конкурсы – урам театры һәм урам биюе фестивале узачак. Бу хакта чараны оештыручылар хәбәр итте.

Бу вакыйга урам сәнгатенең заманча формаларын һәм Идел буе татарлары һәм халыкларының бай халык мәдәнияте традицияләрен берләштерәчәк. Бу көнне Каюм Насыйри урамында уникаль тарихлы җиде урын җанланачак: Күнче урамы, Шиһабетдин Мәрҗани йорты, Зәйни Солтан скверы, «Казан Манзарасы» арт-объекты янындагы сәхнә, сәүдәгәр Муллин йорты, Каюм Насыйри скверы һәм беренче «Әл-Мәрҗани» Җәмигъ мәчете каршындагы территория.

Фестивальдә бөтен республикадан кимендә 500 кеше катнашыр дип көтелә. Конкурс программасы театр һәм хореография юнәлешләренә бүленеп, 10-14, 15-18 һәм 18-35 яшьлекләр төркемнәрендә җиде номинация буенча җиңүчеләрне бүләкләүне күз алдында тота: татар стилендә урам биюе, Идел буе халык биюе, театральләштерелгән хореография, моноспектакль, театральләштерелгән тамаша, курчак театры һәм мюзикл.

Экспертлар ТР һәм РФ атказанган эшлеклеләре, педагоглар, театр һәм хореография кафедралары доцентлары, медиа шәхесләре һәм телешоуда катнашучылар булачак.

Конкурслардан тыш, фестиваль кунакларын сувенирлар, халык кәсепләре эшләнмәләре һәм китаплар күргәзмә-ярминкәсе, шулай ук татар халык стилизациясендә һәм Идел буе әкиятләре тематикасында фотозоналар көтә.