Быел герой-шагыйрь Муса Җәлил истәлегенә багышланган көрәш турниры Чаллыда узачак
12-14 февраль көннәрендә Чаллы шәһәренең Боз сараенда герой-шагыйрь Муса Җәлил истәлегенә «Ватаным Татарстан» газетасы гамәлгә куйган көрәш буенча ачык турнир узачак. Быел турнир берьюлы өч мөһим датага: Чаллының 400 еллыгына, КамАЗның беренче йөк машинасы чыгарылуга 50 ел тулуга һәм бөек татар шагыйре Муса Җәлилнең 120 еллыгына багышлана.
63нче тапкыр үткәрелә торган ярышта 40тан артык команда һәм 400гә якын көрәшче катнашуы көтелә. Бу хакта бүген «Татар-информ»да узган матбугат очрашуында сөйләделәр.
«Муса Җәлил истәлегенә багышланган көрәш турниры – республикада иң дәрәҗәле ярышларның берсе. Бөтен истәлекле вакыйгаларны искә алып, әлеге турнирны нәкъ менә Чаллы шәһәрендә уздырырга булдык. Чаллыда ярышлар һәрвакыт югары дәрәҗәдә уздырылып килде, быел да бик зур әзерлек бара. Ярышлар матур узар дип ышанабыз», – дип сөйләде Татарстан Көрәш федерациясе рәисе Рөстәм Кәлимуллин.
Фото: © «Татар-информ», Солтан Исхаков
Көрәшчеләргә әзерләнгән приз фонды Татарстан беренчелегендә кебек булачак. Беренче урынга 100, икенче 70 һәм ике өченче урын яулаучыларга 50әр мең сум акчалата бүләк каралган.
- Турнирның рәсми ачылу тантанасы 13 февральдә 11:00 сәгатьтә була. Финал алышлары һәм җиңүчеләрне бүләкләү 14 февральгә планлаштырылган.