Татарстан бренды Дубайда коллекциясен тәкъдим итте
Дубайда төрле илләрдән дизайнерлар һәм мода индустриясе вәкилләре катнашында Fashion Factor халыкара fashion-мода күрсәтү узды. Катнашучылар арасында Татарстан Республикасы бренды да бар иде, ул төбәкнең милли айдентикасына һәм мәдәни кодына нигезләнгән коллекциясен тәкъдим итте.
Брендка нигез салучы Динара Сәләхова билгеләп үткәнчә, ул берничә ел дәвамында Татарстан һәм Россия мәдәниятен заманча дизайн аша алга сөрә.
Подиумда традицияләр һәм рухи кыйммәтләр актуаль эстетика белән органик рәвештә бәйләнгән мөселман коллекциясе тәкъдим ителде. Эшләнмәләр тыйнак силуэтлары, затлы тукымалары, кулдан катлаулы чигү бизәкләре һәм детальләргә аерым игътибар бирелүе белән аерылып тора. Татарстанның мәдәни мирас мотивлары, традицияләре һәм хәзерге заман арасында баланс сакланган.
«Санкцияләргә карамастан, эшләнмәләргә Россиядә генә түгел, ә аннан читтә дә ихтыяҗ бар. Бүген без үз эшләнмәләребезгә чит ил аудиториясеннән тотрыклы кызыксыну күрәбез – бигрәк тә Европада һәм АКШта. Бу дизайнга салынган мәдәният теленең сәяси контекстка карамастан аңлаешлы һәм кирәкле булып калуы турында сөйли», – диде Динара Сәләхова.
Fashion Factor Дубайда ел саен үткәрелә торган мода атналыгы кысаларында узды һәм бөтен дөньядан дизайнерларны берләштерүче халыкара программаның бер өлеше булды. Татарстан брендының катнашуы дөнья fashion-киңлегендә төбәк дизайнерларының потенциалын күрсәтте һәм халыкара мәйданда милли мәдәниятне популярлаштыруга өлеш кертте.