Рөстәм Миңнеханов «Ел инновациясе» конкурсы лауреатларына бүләкләр тапшырды
Татарстан Икътисад министрлыгы коллегиясендә ел саен үткәрелә торган «Ел инновациясе» республика конкурсында җиңүчеләрне бүләкләү тантанасы узды. «Студентлар стартабы», «Корпоратив инновация» һәм «Интеллектуаль милек» номинацияләрендә бүләкләрне Татарстан Рәисе Рөстәм Миңнеханов тапшырды.
Тантанада шулай ук Россия Икътисади үсеш министры урынбасары Святослав Сорокин, инновацияләргә ярдәм Фонды генераль директоры Андрей Жижин һәм Россия Инновацион регионнары ассоциациясе директоры Александр Смекалин катнашты. Конкурсны Татарстанның Инвестиция-венчур фонды, республиканың Мәгариф һәм фән Министрлыгы һәм ТР Фәннәр Академиясе оештыра.
Конкурс яшьләрне фәнни-тикшеренү эшчәнлегенә һәм фәнни-технологик иҗатка җәлеп итүгә, шулай ук төбәк икътисадына кертү потенциалы булган проектларга һәм әзер карарларга ярдәм итүгә юнәлдерелгән. 2025 елда катнашучылар яңа материаллар, машина төзелеше, мәгълүмати технологияләр, медицина, биотехнологияләр, сәнәгать һәм аграр сектор өлкәсендәге эшләнмәләрне тәкъдим иттеләр.
2025 елда конкурска барлыгы 228 гариза кергән. «Студентлар стартабы» номинациясендә – 65, «Корпоратив инновация» категориясендә – 9, «Интеллектуаль милек» номинациясендә 52 гариза бирелгән иде. Студентлар номинациясендә университет стартап-студияләре ярдәмен алган яки «Студентлар стартабы» федераль программаларында җиңүче булган авторларның проектлары катнашты.
«Корпоратив инновация» категориясендә гаризаларны инновацияләр үсеше өлкәсендә эшләүче юридик затлар, шулай ук стартаплар белән пилот проектлар тәкъдим итте. «Интеллектуаль милек» номинациясендә гамәлдәге патент һәм расланган кертү һәм коммерцияләштерү фактлары булган эшләнмәләр каралды.