Мишустин Россиядә тулаем эчке продуктның өч елда 10 процентка артуы турында хәбәр итте
Тышкы басымга да карамастан, Россия икътисады уңай динамиканы саклый. РФ Премьер-министры Михаил Мишустин Дәүләт Думасында Хөкүмәт эшчәнлеге турындагы хисап барышында шулай дип белдерде. Бу хакта ТАСС агентлыгы хәбәр итә.
Премьер-министр искәрткәнчә, өч ел эчендә икътисадның гомуми үсеше 10 проценттан артып киткән, моны гомумдөнья күрсәткечләре белән чагыштырырга мөмкин.
«Катлаулы вазгыятькә карамастан, икътисадта уңай динамика сакланып калды. Россиядә тулаем эчке продукт узган ел 1 процентка артты. Өч ел эчендә аның үсеше 10 проценттан артып китте, бу гомумдөнья дәрәҗәсенә туры килә», - дип белдерде Михаил Мишустин.
Хөкүмәт башлыгы сүзләренчә, мондый нәтиҗәләргә Президент билгеләгән өстенлекле юнәлешләрдә ресурсларны туплау һәм технологик лидерлыкка юнәлдерелгән яңа илкүләм проектларны оператив гамәлгә ашыру нәтиҗәсендә ирешелгән. Шул ук вакытта, премьер агымдагы бурычларның катлаулануын таныды: алар озак вакытлы инвестицияләр, инфраструктураны киңәйтү һәм үз компетенцияләреңне ныгытуны таләп итә.
Михаил Мишустин шулай ук дәүләт идарәсе системасының камилләштерелүен искәртте. Заманча механизмнар хакимиятләргә икътисадта зәгыйфь урыннарны тизрәк табарга һәм дәүләт сәясәтенә үз вакытында төзәтмәләр кертергә мөмкинлек бирә.