Фәрит Мөхәммәтшин төбәк иҗтимагый кабул итү бүлмәсендә гражданнар белән очрашты
Дәүләт Советы Рәисе, «Бердәм Россия» партиясенең Татарстан төбәк бүлеге Секретаре Фәрит Мөхәммәтшин гражданнарны кабул итте. Мөрәҗәгатьләр идарәче компания эшенә һәм транспорт белән тәэмин итүгә кагылды, дип хәбәр итә ТР Дәүләт Советы матбугат хезмәте.
Декабристлар урамындагы йортта яшәүче хезмәт ветераны Виктор Трушин капиталь ремонттан соң берничә ел узгач йортның түбәсеннән су ага башлау һәм фатирдагы җылыту приборлары начар эшләү турында хәбәр итте. Аның сүзләренчә, тикшерүче органнар җитешсезлекләрне ачыкламаган.
Мөхәммәтшин ТР Торак инспекциясенә бу объектны контрольгә алырга кушты. Кабул итүгә чакырылган ведомство башлыгы Александр Тыгин билгеләп үткәнчә, инспекторлар инде урынга барган булган. Җитәкче кабат тикшерү уздырырга вәгъдә итте. Идарәче компания яисә подрядчы ягыннан хокук бозулар ачыкланган очракта, алар җаваплылыкка тартылачак.
Рус география җәмгыятенең төбәк бүлеге рәисе Дмитрий Шиллер студентларга экспедициядә катнашу өчен транспорт сорап мөрәҗәгать итте. Мөрәҗәгать эшкә алынды.
Кабул итү барышында Фәрит Мөхәммәтшин һәм Дәүләт Советы депутаты Ренат Вәлиуллин Шиллерның инициативасы белән Рус география җәмгыятенең төбәк бүлеге һәм Татарстан халыклары ассамблеясе арасында килешү имзалау перспективалары турында фикер алышты.
Әлмәттә яшәүче Эдуард Маннанов Мөхәммәтшинга элегрәк күрсәткән ярдәме өчен рәхмәт белдерде һәм «Годы и люди Таттрансгаза» дигән китап тапшырды.