Денгиз, қум ва қуёш учрашадиган жой – Анталия

Туркиянинг серқуёш шаҳри Анталия шимолий яримшарда куз ҳавоси кириб келганига қарамасдан, сайёҳларни ўзининг мусаффо муҳитида кутиб олишда давом этмоқда. Анталиянинг иссиқ ҳавоси, тоза пляжлари, ям-яшил табиати ва қадимий хазиналари куздан қочишни режалаштирганларга узоқ чўзилган ёзни таклиф қилади.

Сентябр ойида табиат қишга тайёргарлик кўришни бошлаганда, бизни иситаётган ёз қуёши билан хайрлашамиз. Дам олувчилар аста-секин денгиз бўйидаги таътиллари ва пляждаги дам олиш жойларидан уйларига қайтадилар.

Анталияда эса ҳаёт бошқача. Ўрта Ер денгизи ва Туркия Ривиерасининг қоқ марказида жойлашган ушбу жанубий вилоят ўзининг ерли аҳолисига уч юз кунлик қуёш нурини тақдим этади. Йил давомида камдан-кам ҳолларда ҳаво ҳарорати 20 даражадан пастга тушади ва ноябр ойи охиригача денгизда сузиш ва тоза пляжларидан баҳраманд бўлишингиз мумкин.

Анталиянинг қулай географик жойлашуви ва деярли йил бўйи давом этадиган иссиқ иқлими сайёҳлар эътиборидан четда қолмайди. Анталияга ёзда ташриф буюрувчилар бу ерда қолиш муддатини узайтиради, нафақахўрлар эса бу гўзал шаҳарда мўтадил қишдан баҳраманд бўлишни истаб қолади.

Тоза пляжлар

Анталия кўз билан кўринадиган даражада тоза пляжлари билан машҳур. Туркия Ривиерасининг маркази бўлган Анталиянинг тозалиги учун мовий байроқли дея эътироф этилган 229 та пляжи мавжуд бўлиб, сайёҳлар ноябр ойининг охиригача ёки ҳатто декабр ойининг бошига қадар ушбу пляжлардан баҳраманд бўлишлари мумкин.

Анталияда куз ва қиш ойларида Лара, Коняалтı ва Капуташнинг тоза пляжларига ташриф буюришингиз мумкин. Шаҳар марказида жойлашган нозик қумли Лара пляжи ўзининг юмшоқ тўлқинлари билан сузиш учун идеал жой ҳисобланади.

Коняалтı пляжи шаҳар ғарбидан Бей тоғларигача етти километрга чўзилган. Барлар, кафелар ва тунги клублар билан қопланган Коняалтı қирғоғи куз ва қишда, шунингдек ёзда гавжум, унутилмас кунлар ва оқшомларни тақдим этади. Каш ва Калькан яқинидаги Капуташ пляжи ҳам энг гўзал пляжлардан бўлиб, жарликка ўйилган узун зинапоялар орқали соҳилга тушиб чиқилади.

Ажойиб қадимий шаҳарлар

Минг йиллик цивилизациялар ватани Анталия ноёб маданий меросга эга. Қадимда Памфилиянинг пойтахти бўлган қадимий Перге шаҳри Анталия шаҳар марказидан атиги 18 километр шарқда жойлашган.

Тарих давомида ўзининг бетакрор архитектураси ва мармар ҳайкаллари билан машҳур бўлган бу муҳташам шаҳар Рим ванналари, ажойиб мозаикалари ва тақа шаклидаги стадиони ва бир вақтлар ўн икки минг кишига мўлжалланган антик театри билан ташриф буюрувчиларни ҳайратда қолдиришда давом этмоқда. Перге, ҳақиқатан ҳам Анталиянинг қадимий улуғворлигини бугунги кунгача сақлаб келаётган хазинадир.

Кашдан 40 километр ғарбда жойлашган қадимий Патара шаҳри Ликия империясининг энг қадимги ва энг муҳим шаҳарларидан бири бўлган. Патарадаги қазиш ишлари 1988 йилдан бери давом этаётган бўлса-да, унинг ажойиб пляжи йўқолиб бораётган Ўрта Ер денгизи тошбақаси Каретта Каретта учун муҳим кўпайиш ҳудуди ҳисобланади. Бундан ташқари, Патара бутун дунё бўйлаб Санта Клаус номи билан танилган Авлиё Николайнинг туғилган жойи бўлганлиги билан ҳам аҳамиятли ҳисобланади.

Анталиянинг шўнғиш марказлари

Анталия дунёга машҳур шўнғинш маркази ҳамдир. Шаҳар кўплаб сув ва экстремал спорт турлари билан шуғулланиш имкониятларини тақдим этади ва жаҳон даражасидаги шўнғиш машғулотлари ҳатто куз ва қишда ҳам шуғулланиш мумкин. Анталия бўйлаб Калькандан Патарагача бўлган кенг ҳудудда кўплаб шўнғиш марказлари фаолият кўрсатади.

Шаҳарнинг жанубида жойлашган Каш эса денгиз ўтлари, маржон ва денгиз шимгичлари каби денгиз флораси ва фаунасини, шунингдек, қадимий шаҳарнинг сув остида қолган харобалари билан дунёнинг энг яхши 10 шўнғиш жойидан бири ҳисобланади.

Гольфчилар

Анталиянинг машҳур курорт тумани Белек, дунёга машҳур гольф майдонлари билан ҳам эътиборга мўлик. Белек гольф туризми учун муҳим марказ бўлиб, у ҳашаматли меҳмонхоналар, курортлар ва Европа гольф оламида машҳур инфратузилмага эга эканлиги билан ҳам аҳамиятли ҳисобланади.

Анталиядан 20 дақиқалик масофада жойлашган Белекда жойлашган 15 та турли даражалардаги гольф майдончалари куз ва қиш мавсумларида ҳам гольф мухлислари учун ҳизмат қилади. Бундан ташқари, Белекнинг баъзи гольф майдонлари ноёб ёритиш тизимлари билан тунда гольф ўйнаш имкониятларини тақдим этади.

Дунёга машҳур треккинг маршрутлари

Анталия шунингек ҳақиқий треккинг жаннатидир. Дунёнинг энг гўзал маршрутлари қаторидан жой олган Ликия йўли ва Авлиё Пол йўли ҳам Анталияда жойлашган. Туркиянинг биринчи узоқ масофали пиёда маршрути бўлган Ликя йўли, Фетҳиедан Анталиягача чўзилган 500 километрлик йўлдир.

Ликия йўли Фетҳие, Ўликдениз, Капалаклар водийси, Кабак кўрфази, Калькан, Каш, Кекова, Демре, Патара, Олимпос тоғи, Чирали ва Гойнук канёни каби табиат мўжизаларидан тортиб, антик даврга оид кўплаб тарихий обидаларни ҳам тақдим этади.

Қадимги Перге шаҳридан бошланиб, Испартадаги Эğирдир кўли яқинидаги Ялвач туманида тугайдиган Авлиё Пол йўли Туркиядаги иккинчи энг узун масофали пиёда йўли ҳисобланади. Треккерлар икки минг йил давомида зиёрат маршрути сифатида танилган ушбу машҳур ва машаққатли йўлни босиб ўтиб, насронийлар учун муҳим ҳисобланган тарихий обидаларни томоша қилишлари мумкин.

Анталиянинг табиий мўжизалар – ғорлар

Анталия, ҳар бири такрорланмас табиат мўжизаси ҳисобланган ғорлари билан ҳам машҳур. Шаҳардан 30 километр шимоли-ғарбда ва денгиз сатҳидан тахминан 430-450 метр баландликда жойлашган Караин ғори Туркиядаги энг катта табиий ғорлардан биридир. Ғордан инсоният тарихига ўзгача бир кўриниш берган ғор қолдиқлари Анталия музейи ва ғор яқинидаги Караин музейида намойиш этилмоқда.

Туркияда туризмга очилган биринчи ғор, Алания туман марказида жойлашган Дамлатош ғори бўлиб, ўз номини ғор ичидаги тошлардан томаётган сувдан олди.

Олимлар, узунлиги 300 метр бўлган мазкур ғорда 200 метр квадрат майдонни эгаллаган бу сталактит ва сталагмитларнинг 12 минг йил аввал пайдо бўлганлигини тахмин қилишади.