“Рома” Шомуродовдан воз кечди, Моуриньо эса ўйланиб қолди! — Бизга қўшилинг: ???? https://t.me/joinchat/AAAAADwt0NGCRoONT4f1_Q
“Рома” спорт директори Тьягу Пинто қишки трансферлар даври учун тузилган режаларни кетма-кет амалга оширишга ҳаракат қилмоқда. Пойтахт клуби раҳбарияти ҳозирги таркибни тарк этадиган футболчиларнинг номини аниқлаб бўлган. La Repubblica нашри “Рома” биринчи навбатда, етарли ўйин амалиётига эга бўлмаётган ўзбекистонлик ҳужумчи Элдор Шомуродов, уругвайлик ҳимоячи Матиас Вина ва бош мураббий Жозе Моуриньо билан можарога борган нидерландиялик ўнг қанот ҳимоячиси Рик Касрдорпдан воз кечиш қарорини тасдиқлагани ҳақида ёзди. Маълумки, “Рома” ва “Торино”нинг Шомуродов трансфери бўйича музокараси ҳал қилувчи босқичга кирди. Томонлар тез орада охирги учрашувни ўтказишга тайёргарлик кўрмоқда. Яна бир нуфузли манба – https://tuttoasroma.it сайти Жозе Моуриньо Элдорнинг трансферига рухсат беришга шошилмаётганини маълум қилди. Португалиялик мутахассис бир қарорга келиши учун яқинда трансфер қилинган янги ҳужумчи – Ола Солбаккеннинг имкониятларини чуқурроқ ўрганиб чиқиши лозим. Сайт экспертлари Моуриньо ўтган йили “Будё-Глимт”нинг “Рома”га қарши ўйинларида кўрган ҳужумчининг нималарга қодирлигини билмаслигини таъкидламоқда. Жозе Моуриньо Ола Сольбаккен Элдор Шомуродовнинг ўрнини босишини кўрсата олган тақдирдагина ўзбек ҳужумчисининг трансферига рухсат бериши мумкинлиги айтилмоқда. Таъкидлаш жоизки, ёзда ҳам Жозе Моуриньо бошқа клубга отланган Шомуродовга Римда қолиб, асосий таркиб учун курашишни маслаҳат берган ва албатта унга имкон берилишини маълум қилганди. Элдор ҳам таниқли мураббийнинг гапига ишониб, “Рома”ни тарк этмаган эди. Бироқ, ваъда қилинган имконият берилгани йўқ. Спорт директори Тьягу Пинто бир неча янги харидларни амалга оширишга бел боғлаган. Бунинг учун у чиқиш трансферларига ҳам ишлаши шартлигини билади. Трансфер бўйича мутахассислар Рим клуби янги ижрочиларни олиши учун камида икки ўйинчисини бошқа жамоага жўнатиши лозимлигини билдиряпти. Айни пайтда “Рома” мутасаддилари чиқишга қаратилган бир неча трансферлар бўйича ишни давом эттирмоқда. Хусусан, ҳозирги таркибда борлардан Матиас Винани “Бетис”га жўнатиш ҳаракати бор. Испан клуби уругвайлик ҳимоячига жиддий қизиқиш билдирмоқда. Жаҳон чемпионати қатнашчиси ҳам Элдор сингари етарли ўйин амалиётига эга бўлмаяпти. Шунингдек, Рик Карсдорп ҳам ўзига янги жамоа қидирмоқда. Моуриньо ҳали ғазабидан тушгани йўқ ва ҳимоячини ўйин қайдномаларига киритмаяпти. Бундан ташқари, Тьягу Пинто нидерландиялик футболчи ўрнига бошқа ижрочиларни олиб келишга уринмоқда. Номзодлар орасида “Реал”да тарбияланган Альваро Одриосола ҳам бор. Тьягу Пинто эътиборидан мавсум бошидан бери ижарада юрган ўйинчилар ҳам четда қолгани йўқ. Римликлар “Валенсия”га ижарага берилган нидерландиялик ҳужумкор футболчи Жастин Клюйвертнинг трансфер ҳуқуқини испан клубига сотиш бўйича музокараларнинг якуний босқичини ўтказмоқда.