Хитойда биринчи марта пойгачи от клонлаштирилди, деб хабар беради AFP. Клонлаштириш бўйича тажриба SinoGene компанияси томонидан ўтказилди, унинг устидаги ишлар 2021 йилдаёқ бошланган эди. Клонлаштирилган тойчанинг лақаби Чжуан Чжуан («бақувват», «миқти») бўлиб, у 2022 йил 16 июнь куни дунёга келган. Соматик ҳужайралар Урсус лақабли наслдор отнинг тери намунасидан олинди, у Хитойга 2007 йилда Германиядан келтирилганди. Чжуан Чжуан етти ойлик бўлди, у 2028 йилги олимпиадада қатнашиши мумкин. У вақтгача отнинг ёши талаб даражасигача етади. Клонлаштиришни амалга оширган компания маълум қилишича, клон ўз оригиналининг барча хусусиятларини олган, аммо барибир машқ қилиши керак бўлади. «Олимпиада учун мўлжалланган ҳар битта отнинг нархи бир неча миллиондан бошланиб, 10 миллион юань (1,5 миллион доллар)гача боради. Клонлаштириш отларни кўпайтириш ва етиштириш қийматини пасайтириш имконини беради», — деди SinoGene бош директори Ми Цзидун. 2022 йил сентябрида Хитой олимлари дунёда биринчи бўлиб Арктика бўриси (Canis lupus arctos)ни клонлаштиргани хабар берилган эди. Бўри боласининг дунёга келганини SinoGene биотехнология компанияси бош директори Ми Цзидун 20 сентябрь куни махсус ташкил қилинган тақдимот чоғида эълон қилганди. Ми Цзидун қайд этишича, клонлаштириш жараёни ҳайвонлар учун хавфсиз бўлиб, уларнинг саломатлигига таъсир ўтказмайди. Клонларнинг ҳаёти давомийлиги ҳам оддий ҳайвонларникидан фарқ қилмайди.
