U-17 терма жамоамиз Чилини енгиб, ЖЧга ишонч билан қадам ташлади
Жамоамиз 11 июнь куни Чилининг ўсмирлар терма жамоасига қарши назорат учрашуви ўтказди. Қизғин ва кескин курашларга бой бўлган беллашувда Ислом Исмоилов бошчилигидаги юртдошларимиз минимал ҳисобда ғалаба қозонди — 1:0.
Беллашувдаги ягона ва ҳал қилувчи гол учрашувнинг 35-дақиқасида Азизбек Эримбетов томонидан киритилди. Унинг аниқ ва шиддатли зарбаси дарвозабонни чорасиз қолдирди ва гол сўнгги натижани белгилаб берди.
Мазкур натижа футболчиларимиз учун нафақат руҳий, балки тактик жиҳатдан ҳам катта тажриба бўлди. Таъкидлаш керакки, бундай ўйинлар Жаҳон чемпионатида муносиб иштирок этиш учун муҳим тайёргарлик босқичидир.
Ўсмирлар терма жамоамиз 13 июнь куни Чилига қарши яна бир бор майдонга тушади. Шундан сўнг, жамоа 17 ва 19 июнь кунлари Боливия ўсмирлари билан иккита ўртоқлик учрашувида иштирок этади.
Назорат учрашуви натижаси:
Чили – Ўзбекистон — 0:1
Гол муаллифи: Азизбек Эримбетов (35-дақиқа)
Ёшларимизнинг саъй-ҳаракатлари, интизоми ва жипслиги уларни халқаро мусобақаларда муносиб рақибга айлантиради. Жамоамизга келгуси ўйинларда ҳам омад ва зафарлар ҳамроҳ бўлишини тилаймиз!