Лос-Анжелесдаги намойишлар: байроқ ёниб, зўравонлик авж олмоқда

Лос-Анжелес шаҳрида сўнгги кунларда юзага келаётган намойишлар тобора кескин тус олмоқда. Қатор маҳаллий ва миллий ОАВларнинг ёзишига қараганда, кўчаларда йиғилган намойишчиларнинг катта қисми тинч шаклда эмас, балки зўравонлик йўли билан ўз эътирозини ифода этмоқда.

Оқ уй матбуот котиби Кэролайн Ливитт мазкур вазиятга муносабат билдириб, кўплаб намойишчилар тартибсизликлар сабабли ҳибсга олинганини маълум қилди.

"Бу фақатгина полицияга қарши қаратилган ҳаракат эмас, балки Америка жамияти ва унинг қадриятларига қарши ҳам ҳужумдир. Байроқларни ёқиш, кўчаларда портлашлар ва талончиликлар — буларнинг барчаси хавфли тенденциянинг белгисидир", — деди Ливитт.

Унинг сўзларига кўра, АҚШ президенти Дональд Трамп тинч намойиш ўтказиш ҳуқуқини тўлиқ қўллаб-қувватлайди, бироқ оммавий зўравонликка қарши қатъий чора кўрилишини таъкидлаган. "Президент Трамп Америкада анархия ва назоратсиз оммавий бошқарувга ҳеч қачон йўл қўймайди", — деб қўшимча қилди у.

Ҳозирда шаҳарда хавфсизлик чоралари кучайтирилган. Ҳуқуқ-тартибот органлари намойишчилар билан тўқнашувларнинг олдини олиш учун кучларини сафарбар қилмоқда. Айни вақтда жамоатчилик орасида вазиятга нисбатан турлича фикрлар пайдо бўлган: баъзилар бу ҳаракатларни сўз эркинлиги деб ҳисобласа, бошқалар эса тартибсизликларни кескин қораламоқда.

Мутасаддилар вазиятни назорат остига олиш ва тинчликни тиклашга интилаётгани айтилмоқда. Намойишлар ва улар билан боғлиқ ҳодисалар ҳозирча ўз долзарблигини йўқотмаётгани маълум.