Шота Арвеладзеден Ўзбекистонга самимий ЖЧ табриги йўлланди
Ўз вақтида тўрт йил мобайнида Ўзбекистонда фаолият олиб борган Арвеладзе юртимизда қолган хотиралар ва шахсий алоқаларни унутмаганини яна бир бор намоён этди. У терма жамоанинг тарихий ютуғи — илк бор мундиалга йўлланмани қўлга киритганини катта ҳаяжон ва қувонч билан қарши олганини таъкидлади.
“Тарихда биринчи марта Жаҳон чемпионати йўлланмасини қўлга киритган Ўзбекистон терма жамоасини чин қалбимдан табриклайман! Мен тўрт йил фаолият юритган, меҳнат қилган ва дўстлар орттирган мамлакат шундай улкан муваффақиятга эришганидан жуда хурсандман. Биргаликда ишлаган собиқ футболчиларим, уларнинг ютуқлари мени фахрлантирмоқда,” — дейди машҳур мураббий ўз табригида.
Шунингдек, Арвеладзе миллий терма жамоа мураббийи, футбол фахрийлари, ходимлар ва Ўзбекистон футбол ассоциацияси раҳбариятини ҳам алоҳида табриклади. У бу ғалабани нафақат спорт соҳасидаги ютуқ, балки юрт шарафини дунё ареналарида намоён этадиган муҳим қадам сифатида баҳолади.
Шота Арвеладзенинг бундай табриги нафақат спорт жамоатчилиги, балки Ўзбекистон футбол мухлислари учун ҳам катта аҳамиятга эга. Унинг меҳри ва самимий муносабати мамлакатимизда футболнинг тараққиётига қўшган ҳиссасини яна бир бор намоён этмоқда.