Хоразм таомлари ифтихори — «Тухум барак»га давлат ҳимояси берилди
Мазкур таом нафақат ўзига хос тайёрланиш жараёни, балки таркиби ва тарихий қадриятларга асосланган анъанавий услуби билан ҳам ажралиб туради. «Тухум барак» асрлар давомида Хоразм халқи дастурхонида алоҳида ўрин эгаллаб келмоқда. Уни тайёрлаш учун махсус чигал хамир, табиий маҳсулотлар, хусусан тухум, пиёз ва турли кўкатлар ишлатилади. Ҳар бир бўлагида нафақат мазза, балки халқнинг меҳнати ва меҳри ҳам сезилиб туради.
Географик кўрсаткич мақомининг берилиши «Тухум барак»нинг сифатини таъминлаш, ноёблигини сақлаш ва уни Хоразм бренди сифатида янада кенг тарғиб этишда муҳим ҳуқуқий қадам бўлди. Энди ушбу таом фақат ўзига хос ҳудудий хусусиятлари билан тан олиниши ва ҳимоя қилиниши мумкин.
Шу ўринда таъкидлаш лозимки, географик кўрсаткич — бу маълум маҳсулотнинг белгиланган ҳудудда тайёрланиши ва у ернинг табиий ва инсон омили билан боғлиқ ҳолда хос сифат ва хусусиятларга эга бўлишини тасдиқловчи интеллектуал мулк тури ҳисобланади. Бу эса фақатгина сифат белгиси эмас, балки миллий ғурур, тарихий мерос ва анъанавий билимларнинг юридик муҳофазаси ҳамдир.
Адлия вазирлигининг мазкур қарори нафақат Хоразм таомлари, балки Ўзбекистоннинг гастрономик маданиятини дунёга намоён этишда янги босқични бошлаб бериши мумкин. Энди «Тухум барак» наинки мазали таом, балки миллий бренд, ҳудуднинг шарафини ифода этувчи бой мерос сифатида кенг оммага таништирилади.