Исроил Ғазодаги амалиёт учун 60 минг киши жалб қилмоқда
Исроил мудофаа армияси Ғаза шаҳрида ўтказиладиган “Гидеон аравалари—2” амалиётига тайёргарлик доирасида 60 минг нафар захирадаги ҳарбийни чақирди, деб Kursiv хабар берди.
Қўшимча равишда яна 20 минг захирачи хизмат муддатини узайтирди. Амалиёт Исроил мудофаа вазири Исраэль Кац томонидан маъқулланган.
Режага кўра, амалиёт Ғазони тўлиқ эгаллаш, ҲАМАС ташкилотини йўқ қилиш ва анклавда янги бошқарув инфратузилмасини яратишни кўзда тутади.
Деярли икки йиллик ҳарбий ҳаракатлар давомида анклавда 60 мингдан ортиқ фаластинлик ҳалок бўлди, улар орасида 18,5 минг нафар болалар ҳам бор.