Инвестиция жалб этиш учун махсус платформа ишга туширилади
Ўзбекистонда лойиҳаларга маблағ жалб қилишни соддалаштириш мақсадида махсус инвестиция платформаси ишга туширилади, деб Kursiv хабар берди.
Бу ҳақда Президент Шавкат Мирзиёев тадбиркорлар билан очиқ мулоқот пайтида маълум қилди. Мазкур платформада молиялаштиришга қизиқиш билдирганлар ўз лойиҳаларини жойлаштиришлари мумкин бўлади.
Инвесторлар бу лойиҳаларни ўрганиб чиқадилар ва муассис эмас, даромад бўйича ҳамкор сифатида иштирок этадилар. Президент таъкидлашича, инвестициялар кафолатли ҳимояга эга бўлади.
Янги тизим орқали тадбиркорлар ҳар йили қўшимча равишда 1 миллиард доллар (тақрибан 12,5 трлн сўм) жалб қилиш имконига эга бўладилар.
Мирзиёевнинг айтишича, амалдаги тартибга кўра, масъулияти чекланган жамиятлар инвесторни муассислар таркибига қўшиши шарт. Аммо бу усул ҳаммага ҳам маъқул келмайди ва асосий юк банкларга тушмоқда.