Ҳиндистонда полиция кабутарни ҳибсга олди

Ҳиндистоннинг Жамму шаҳрида полиция ноодатий ва ажиб ҳолатга дуч келди: пойтахт темирйўл вокзалига портлаш юбориш ҳақида кабутар орқали етказилган хат топилди ва кабутар ҳибсга олинди. Бу ҳақда маҳаллий ҳуқуқ-тартибот органлари хабар берди.

Воқеа 18 август куни кечқурун Катмария ҳудудида, Покистон билан чегарага яқин масофада содир бўлган. Кабутарнинг оёғига боғланган хатда урду ва инглиз тилларида “Kashmir Freedom” (Кашмир озодлиги), “Time has come” (Вақт келди) деган сўзлар ёзилган эди ва темирйўл вокзалида портлаш бўлиши мумкинлиги ҳақида огоҳлантирилган.

Махсус манбаларнинг маълумот беришича, бу Ҳиндистонда кабутар орқали етказилган биринчи таҳдид хати сифатида қайд этилмоқда. Аввалроқ, мамлакат ҳудудидан Покистон тарафидан ҳаво шарлари, байроқлар ва турли ёзувлар учирилгани кузатилган, лекин кабутар орқали хат юбориш ҳолати биринчи марта рўй бермоқда.

Полиция хавфсизлик чораларини қатъий кучайтирди. Вокзал ва темирйўл атрофида қўшимча кучлар, кинологлар ва сапёрлар жойлаштирилди. Мутахассислар воқеани оддий ҳазил ёки пухта режалаштирилган фитна сифатида аниқлашга ҳаракат қилмоқда.

Экспертлар фикрига кўра, кабутар махсус тарзда ўргатилган бўлиши мумкин ва шу сабабли ҳуқуқ-тартибот идоралари бундай ноодатий таҳдидларга жиддий ёндашмоқда. Улар бу ҳолатни текширишда барча имкониятлардан фойдаланмоқда, хатнинг ким томонидан ва қандай мақсадда юборилганини аниқлашга ҳаракат қилмоқда.

Бу воқеа ҳиндистонлик аҳолини ҳайратга солди ва кабутарлар орқали ҳам жиддий таҳдидлар келтирилиши мумкинлигини кўрсатди. Пойтахт ва чегара ҳудудларида хавфсизлик чоралари ҳозирда максимал даражада сақланмоқда.