Тошкентда бола Malibu ҳайдагани учун: отаси жавобгарликка тортилди
Пойтахтда савдо маркази автотурарғоҳида вояга етмаган шахс Malibu русумли автомобилни ҳайдаётган видеолавҳа ижтимоий тармоқларда катта муҳокамага сабаб бўлди. Йўл ҳаракати хавфсизлиги давлат инспекцияси ушбу ҳолат юзасидан расмий изоҳ берди.
Маълумотларга кўра, воқеа Чилонзор туманидаги Бунёдкор шоҳ кўчасида содир бўлган. Аввалроқ тарқалган видеода бола автотурарғоҳда автомобилни бошқараётгани акс этган.
Ҳуқуқ-тартибот органлари ходимлари ҳолатни ўрганиб, боланинг шахсини аниқлади. Шундан сўнг у ва унинг ота-онаси профилактик суҳбат ҳамда процессуал чоралар кўриш учун чақирилди.
Текширув натижасида боланинг отасига нисбатан маъмурий баённома расмийлаштирилди. Унга болаларни тарбиялаш ва назорат қилиш мажбуриятларини бажармагани учун Маъмурий жавобгарлик тўғрисидаги кодекснинг 47-моддаси асосида чора кўрилди.
Мутасаддилар аҳолини яна бир бор огоҳлантириб, нобалоғонларнинг автомобил бошқариши нафақат қонунбузарлик, балки ҳаёт учун жиддий хавф туғдиришини таъкидлашди. Шу боис ота-оналар фарзандлари устидан қатъий назорат ўрнатиши лозимлиги қайд этилди.