Миср Фаластинликларнинг кўчирилишига қарши чиқди
Миср ташқи ишлар вазири Бадр Абделатти Фаластинликларнинг мажбурий кўчирилишини қатъиян рад этди. Унга кўра, бу масала Миср учун “қизил чизиқ” бўлиб, бунга асло йўл қўйилмайди.
Абделатти Фаластин халқини кўчириш уларнинг бутунлай йўқолиб кетишига олиб келишини айтди. У бундай ҳаракатнинг на қонуний, на ахлоқий асосга эга эканини таъкидлади.
Миср расмийси Исроилни халқни қиришда айблади. Унинг фикрича, Ғазода тинч аҳолининг оммавий ўлдирилиши ва атайлаб очлик сиёсати олиб борилмоқда.
Исроил эса бу айбловларни инкор этиб, ўзини ҳимоя қилаётганини билдирди. Ғазо расмийларига кўра, 2023-йилдан бери 64 мингдан ортиқ фаластинлик ҳалок бўлган ва ҳудудда оғир гуманитар инқироз юзага келган.