Бруно Энрике қасддан карточка олгани учун оғир жазоланди

Ҳужумчи Бруно Энрике қасддан майдондан четлатилиши ва пул тикканлар схемасига алоқадорлиги учун жиддий жазога тортилди.

Олий спорт трибуналининг тартиб-интизом қўмитаси (STJD) 34 ёшли футболчини ҳалол ўйин қоидаларини бузиш ҳамда миллий чемпионат учрашуви натижасига таъсир кўрсатишга уринишда айбдор, деб топди.

Тергов маълумотларига кўра, 2023 йил ноябрида «Сантос»га қарши баҳсда (1:2) Энрике атайлаб сариқ карточка олган. Бу ҳаракат букмекерлик орқали пул тикишда даромад келтиргани аниқланган. Шу боис, футболчи 12 учрашувдан четлатилди ва 60 минг реал (қарийб 11 минг доллар) миқдорида жаримага тортилди. Унинг апелляция бериш ҳуқуқи сақланиб қолди.

STJD таъкидлашича, иш дастлаб билвосита далилларга асосланган бўлса-да, ҳал қилувчи омил сифатида федерал полиция тақдим этган материаллар ҳисобланган. Прокуратурага кўра, футболчининг қилган иши «Фламенго»га зиён етказган ва баҳс натижасига таъсир қилиши мумкин эди.

Шунингдек, 4 нафар ҳаваскор футболчи, жумладан Бруно Энрикенинг укаси Вандер Нуньес Пинту Жуниор ҳам жазога тортилди. Бироқ спорт адлия тизимига алоқаси бўлмаган айрим иштирокчилар жавобгарликдан қутулиб қолди.

Эслатиб ўтамиз, аввалроқ Энрике жиноий жавобгарликка тортилиши ва 18 йилгача қамоқ ҳамда 2 миллион реал (362 минг доллар атрофида) жаримага маҳкум қилиниши мумкинлиги ҳақида хабар берилганди.

Маълумот учун, Бруно Энрике 2019 йилдан буён «Фламенго» шарафини ҳимоя қилиб келмоқда. У жорий мавсумда 40 маротаба майдонга тушиб, 9 та гол урди ва 2 та голли узатмани амалга оширди.