Микель Артета: “Ливерпуль” таркиби лигада энг кучли ҳисобланади
“Арсенал” жамоасининг бош мураббийи Микель Артета Англия Премьер-лигаси чемпионлиги йўлидаги асосий рақиблардан бири сифатида “Ливерпуль”ни кўрсатди. Испаниялик мутахассиснинг фикрича, Арне Слот шогирдлари трансфер бозорида олиб борган ишлари орқали таркибини сезиларли равишда мустаҳкамлади.
Маълумки, ёзги трансфер ойнаси давомида “Ливерпуль” янги футболчиларни харид қилиш учун 400 миллион фунтдан кўпроқ маблағ йўналтирди. Хусусан, Флориан Вирц ҳамда Александр Исаакнинг келиши Англия футболи тарихида энг қиммат икки трансфер сифатида тарихда қолди.
Артета бу ҳақда қуйидагича фикр билдирди:
— “Ливерпуль” ҳозирда жуда ҳам кучли таркибга эга бўлиб турибди. Улар Европа трансфер бозорида энг муҳим деб ҳисобланган икки ўйинчини қўлга киритишди. Мерсисайдликлар бу йўналишда катта иш бажарди, деб айтишим мумкин.
Шу билан бирга, “Арсенал” мураббийи ўз жамоаси ҳақида ҳам тўхталиб ўтди:
— Гарчи “Ливерпуль” таркиби лигада энг кучлилардан бири бўлса-да, биз аввало ўзимизга эътибор қаратишимиз зарур. Асосий масала — уларни қандай ортда қолдиришимиз ва бунга эришиш учун қай йўналишда меҳнат қилишимиз ҳақида ўйлашдир.
Артета жамоаси кейинги турларда чемпионлик учун курашда “Ливерпуль” билан узоқ давом этадиган рақобатни кутмоқда.