Озарбайжонда қариндошлар никоҳи қонун билан ман этилди
Озарбайжонда 2025 йил июль ойидан бошлаб тўйлар сони кескин камайгани қайд этилди. Масалан, июнь ойида 5 мингдан ортиқ никоҳ қайд этилган бўлса, июлда бу кўрсаткич 2 694 тага тушиб кетган. Мутахассислар бу ҳолатни яқин қариндошлар ўртасидаги никоҳларни қонун билан тақиқлаш билан боғлашмоқда.
Маълумотларга кўра, яқин қариндошлар никоҳини тақиқлаш тўғрисидаги қонун 2025 йил 1 июлдан кучга кирган. Янги тартибга асосан, умумий бобо ёки бувига эга бўлган ака-ука ва опа-сингил фарзандлари, шунингдек, биологик жиҳатдан қариндош бўлган амакиваччалар ва холаваччалар ўртасида никоҳ тўлиқ ман этилди.
Бу қарорнинг асосий мақсади генетик нуқсонлар билан туғиладиган болалар сонини камайтириш ва соғлом авлодни таъминлашдир. Тиббий мутахассислар таъкидлашича, қариндошлар ўртасидаги никоҳлар кўп ҳолларда турли ирсий касалликларни келтириб чиқаради, бу эса келажак авлод соғлиғига жиддий хавф солади.
Озарбайжон Адлия вазирлиги маълумотларига кўра, 2025 йилнинг январь–июль ойларида мамлакатда 12 146 та ажрим ҳолати қайд этилган. Бироқ бу кўрсаткич ўтган йилга нисбатан бироз пасайган. Ҳар 1 000 киши ҳисобига ажримлар даражаси 2,1 дан 2,0 га тушгани кузатилган.
Янги қонунга мувофиқ, никоҳ тузиш учун ариза топшираётган барча шахслар қариндошлик даражасини аниқлаш мақсадида туғилганлик тўғрисидаги гувоҳнома ва ота-оналари ҳақидаги ҳужжатларни тақдим этишлари шарт. Агар қоидабузарлик ҳолатлари аниқланса, бунақа ҳаракатлар учун маъмурий ёки жиноий жавобгарлик белгиланган.