«Бухоро» бош мураббийи финалга чиққанидан сўнг қувонч билан гапирди

Ўзбекистон Кубоги ярим финалида «Бухоро» жамоаси «Сўғдиёна»ни 3:2 ҳисобида мағлуб этиб, ўз тарихида илк бор финалга йўлланма олди. Учрашувдан кейин жамоа бош мураббийи Александр Хомяков матбуот анжуманида иштирок этиб, ўйин ва қўлга киритилган ғалаба ҳақида тўхталиб ўтди.

«Келинглар, саволларни қисқа қилиб оламиз, чунки бугун байрам. Бу ғалаба биринчи навбатда футболчиларники. Мен жамоага яқинда қўшилдим, аммо «Бухоро» финалгача катта йўл босиб ўтди – гуруҳ босқичидан чиқди, чорак финалда ғалаба қозонди ва энди ярим финалда ҳам бор кучини кўрсатди. Ҳар бир ўйинчига раҳмат айтаман, чунки бу ютиш барчамизники. Кубок финалида иккинчи бор иштирок этиш имкониятига эга бўлганим учун жуда ҳам бахтлиман. Қийин кечган баҳсда қўшимча таймлар ўтказдик, аммо ҳеч қачон таслим бўлмадик», – деди Хомяков.

Мураббийнинг таъкидлашича, жамоа захирасидан майдонга тушган ёш футболчи Нодирбек Аҳмаджонов киритган ғалаба голи бутун жамоанинг меҳнати натижаси ҳисобланади.

«Мен учун асосий таркибда ўйнаган ёки захирадан тушган футболчининг фарқи йўқ. Ҳар бири жамоага ўз ҳиссасини қўшди. Нодиржон ҳам учрашувга тезда мослашиб кетди ва ўзини ишонч билан кўрсатди. У киритган гол нафақат чиройли, балки жамоани финалга олиб чиққан муҳим гол бўлди. Бугун ғалабада ҳар бир футболчининг ҳиссаси бор. Энди эса барчамиз якдил ҳолда бу муваффақиятни нишонлаймиз», – дея қўшимча қилди бош мураббий.