Гулистонга 52 та экологик автобус олиб келинди
Гулистон шаҳрига экологик тоза, “Евро-5” стандартларига мос ва сиқилган газда ишлайдиган 52 та автобус етказиб берилди. Бу ҳақда Президент Шавкат Мирзиёев матбуот хизмати хабар берди.
Давлат раҳбари Сирдарёга ташрифи давомида янги техника билан танишди. Ҳар бир автобус 60 дан ортиқ йўловчини ташишга мўлжалланган бўлиб, АТТО тўлов тизими билан жиҳозланган.
Маълум қилинишича, Гулистонда брутто-контрактлар асосида жорий этилган 7 та янги автобус йўналиши 23 та маҳаллани қамраб олган. Натижада 29 минг нафар аҳоли жамоат транспорти хизматидан фойдалана бошлади.
Келгусида Гулистон шаҳридаги жамоат транспорти учун яна 30 та узоқ масофага қатновчи автобус сотиб олиниши режалаштирилган. Бу билан юздан ортиқ одам иш билан таъминланиши кутилмоқда.