Лебёф Роналду мухлисларига жавобини айтиб берди

Франция терма жамоасининг собиқ футболчиси Франк Лебёф юлдуз ҳужумчи Криштиану Роналду ҳақида фикр билдирди. «Месси ва Роналду аллақачон йирик совринларни қўлга киритган, аммо ҳақиқат шуки, жаҳон чемпионати кўп нарсани ўзгартиради.

Мен баъзан Роналдуни танқид қилганман, унинг мухлислари эса мени кескин танқид қилишган. Айримлар: “Ўзинг ҳаётда нимага эришгансан?” дерди.

Мен эса: “Мен жаҳон чемпионатида ғолиб бўлганман, у эса йўқ”, деб жавоб берардим. Бу оддий жавоб!

Албатта, Роналду мендан кўпроқ ютуқларга эришган, у фантастик футболчи. Аммо жаҳон чемпионатида ғалаба қозонишнинг аҳамияти бор», — дея Лебёфнинг сўзларини келтиради Goal.

2026 йил ёзида Криштиану Роналду жаҳон чемпионатида иштирок этиши керак. Турнир АҚШ, Канада ва Мексикада бўлиб ўтади.