Флик "Барселона"да ўзини қайта топганини маълум қилди

Каталониянинг "Барселона" жамоаси бош мураббийи Ханс-Дитер Флик клубдаги фаолияти ва шахсий ўзгаришлари ҳақида фикр билдирди. Немис мутахассиси “кўк-анорранглилар” рулда иккинчи мавсумини ўтказмоқда ва бу давр унинг ўзи учун ҳам, жамоа учун ҳам муҳим босқичга айланди.

Ўтган мавсумда “Барселона” Испания ички майдонидаги барча мусобақаларда ғалаба қозониб, ўзининг анъанавий кучини яна бир бор намоён этган эди. Бу натижалар жамоада ишонч ва барқарорлик муҳитини шакллантирди.

— “Барселона” мени бутунлай ўзгартирди. Бу клубни ҳам, уни ўраб турган инсонларни ҳам чин дилдан яхши кўраман. Бизнинг асосий вазифамиз — футболчилар ривожланиши учун тўғри ва соғлом муҳит яратиш. Мен эътиборни айнан шу жиҳатга қаратганман. Агар жамоа мухлисларга стадионга келиб, ҳар бир ўйинни интизорлик билан кутиш учун сабаб бера олса, демак, биз тўғри йўлдамиз, — деди Флик Managing Barca порталига берган интервьюсида.

Мутахассиснинг сўзларидан англашиладики, у фақат натижа ортидан қувиб қолишни эмас, балки узоқ муддатли тараққиётни мақсад қилган. Флик жамоада ишонч, очиқ мулоқот ва ўсишга ундайдиган муҳит яратишни ўз услубининг асоси деб билади.

Айни пайтда “Барселона” Ла Лига турнир жадвалида етакчилик қилмоқда. Каталонияликлар ўзининг азалий рақиби — "Реал Мадрид"дан тўрт очко олдинда бормоқда. Бу эса жамоанинг нафақат яхши ўйнаётганини, балки барқарор шаклланган тизимга эга эканини ҳам кўрсатади.

Қисқаси, Ханс-Дитер Флик қўли остидаги “Барселона” нафақат ғалабалар, балки мазмунли ўйин ва ривожланиш билан мухлисларни ўзига қайта жалб этмоқда. Каталонияда эса ҳозир футбол яна байрамга ўхшай бошлади.