Ўзбекистон тарихида илк бор сунъий йўлдош фазога учирилади
Мустақил Ўзбекистон тарихида илк бор сунъий йўлдош ва биринчи ўзбек космонавтини фазога учириш ишлари бошланди. Бу ҳақда Президент Шавкат Мирзиёев 26-декабрь куни Олий Мажлис ва Ўзбекистон халқига қилган мурожаатномасида маълум қилди. Лойиҳанинг мақсади мамлакатимиз илмий ва технологик салоҳиятини ривожлантиришдир.
2030-йилга бориб IT хизматлар экспортини 5 миллиард долларга етказиш режалаштирилган. Келгуси йилда Тошкент шаҳри, Бухоро, Фарғона ва Тошкент вилоятида 4 та дата-марказ, 2 та суперкомпьютер ва 15 та олийгоҳда сунъий интеллект лабораториялари ишга туширилади. Бу лойиҳалар тиббиёт, транспорт, қишлоқ хўжалиги, геология, банк-молия ва жамоат хавфсизлиги соҳаларида сунъий интеллектни жорий этишга хизмат қилади.
Бугун минглаб иқтидорли ёшлар IT ва сунъий интеллект соҳаларида изланиш олиб бормоқда. Уларнинг дрон ва робототехника йўналишларидаги лойиҳаларини амалиётга татбиқ этиш учун “Рақамли технологиялар маркази” ташкил қилинади. Бу марказ ёш мутахассислар ва иқтидорли олимларни тайёрлашга ёрдам беради.
Шунингдек, “Самарқанд-2028” сунъий йўлдоши Хитойнинг STAR.VISION компанияси билан ҳамкорликда учирилади. Томонлар қўшма лойиҳаларни амалга ошириш, илмий ва технологик интеграцияни кучайтириш ҳамда университетлар ва компаниялар билан ҳамкорлик қилишга келишиб олди.